- ఎంకేపల్లి గ్రామస్తులతో కలిసి చింతా ప్రభాకర్ ఆకస్మిక తనిఖీ!
- మున్సిపల్ అధికారుల నిర్లక్ష్యం వల్లే చెత్త కుప్పలు, కుక్కలు, పందుల స్వైరవిహారం..
- కలుషిత జలాలతో గంగకత్వ కాలువ టెయిల్ ఎండ్ చెరువులకు ముప్పు.
సదాశివపేట, నవంబర్ 03, న్యూస్ పేజ్ :
సదాశివపేట మున్సిపల్ అధికారుల నిర్వహణ లోపాల వల్ల డంప్ యార్డ్ పరిసర ప్రాంతాల ప్రజలు ఎదుర్కొంటున్న నరకయాతనపై సంగారెడ్డి నియోజకవర్గ బీఆర్‌ఎస్ ఎమ్మెల్యే చింతా ప్రభాకర్ మున్సిపల్ అధికారులను తీవ్రస్థాయిలో నిలదీశారు. సదాశివపేట మండల పరిధిలోని ఎంకేపల్లి (ఇంకేపల్లి) గ్రామస్తుల ఫిర్యాదు మేరకు మంగళవారం ఆయన మున్సిపల్ అధికారులు, గ్రామ పెద్దలు, యువతతో కలిసి డంప్ యార్డును క్షేత్రస్థాయిలో ఆకస్మికంగా సందర్శించారు. ఈ సందర్భంగా చెత్తాచెదారంతో నిండిపోయిన రోడ్లను, దుర్వాసనను స్వయంగా పరిశీలించిన ఎమ్మెల్యే, స్థానిక గ్రామస్తుల గోసను అధికారుల దృష్టికి తీసుకెళ్లారు. రానున్న దీపావళి పండుగ లోపు ఇక్కడి సమస్యలన్నింటికీ శాశ్వత పరిష్కారం చూపాలని మున్సిపల్ యంత్రాంగాన్ని కఠినంగా ఆదేశించారు.
మున్సిపల్ అధికారుల దారుణమైన నిర్వహణ లోపం వల్ల డంప్ యార్డ్ చెత్త అంతా రోడ్లపైకి పేరుకుపోయిందని, దీనివల్ల కుక్కలు, పందులు, పశువుల స్వైర విహారం విపరీతంగా పెరిగిపోయిందని ఎమ్మెల్యే ఆగ్రహం వ్యక్తం చేశారు. కుక్కల దాడి భయంతో పాఠశాలలకు వెళ్లే విద్యార్థులు, మహిళలు, పాదచారులు తీవ్ర భయాందోళనలకు గురవుతున్నారని పేర్కొన్నారు. ఇకపై చెత్త ఏమాత్రం రోడ్ల పైకి రాకుండా కేవలం డంపు యార్డ్ లోపల మాత్రమే వేసేలా జాగ్రత్తలు తీసుకోవాలన్నారు. ఈ డంప్ యార్డ్ లీకేజీల వల్ల వర్షపు నీరు పూర్తిగా కలుషితమై దగ్గరిలోని రెండు ప్రధాన చెరువులలోకి చేరుతోందని, దీనివల్ల లోపల ఉన్న చేపలు చనిపోతూ మత్స్యకారులకు తీవ్రంగా నష్టం జరుగుతోందని మత్స్యకారులు ఎమ్మెల్యే దృష్టికి తీసుకువచ్చారు. ఈ రెండు చెరువులు కూడా చారిత్రాత్మక గంగకత్వ కాలువకు టెయిల్ ఎండ్ పాండ్స్ (చివరి చెరువులు) అని గుర్తుచేసిన చింతా ప్రభాకర్.. కలుషిత జలాలు చెరువుల్లో కలవకుండా తక్షణమే డ్రైనేజీ పనులు చేపట్టాలని సూచించారు.
ఈ రసాయన వ్యర్థాల వల్ల చుట్టుపక్కల భూగర్భ జలాలు కూడా పూర్తిగా కలుషితం అవుతున్నాయని, ఈ సమస్యను యుద్ధ ప్రాతిపదికన పరిష్కరించాలని అధికారులను ఆదేశించారు. ఇదే సమయంలో ఎంకేపల్లి చౌరస్తా వద్ద వీధి దీపాలు లేకపోవడం వల్ల తరచూ రోడ్డు ప్రమాదాలు (యాక్సిడెంట్స్) జరుగుతున్నాయని గ్రామస్తులు తెలపడంతో, అక్కడ తక్షణమే హైమాస్ట్ లైట్లు ఏర్పాటు చేయాలని మున్సిపల్ అధికారులకు స్పష్టం చేశారు. ఈ క్షేత్రస్థాయి పరిశీలన కార్యక్రమంలో ఎంకేపల్లి గ్రామ యువత, మాజీ సర్పంచులు రాములు, శేఖర్, గ్రామ పెద్దలతో పాటు ఎమ్మెల్యే చింతా ప్రభాకర్ వెంట మాజీ మార్కెట్ కమిటీ చైర్మన్ సుధీర్ రెడ్డి, కోడూరి రమేష్, మాజీ వైస్ చైర్మన్ శ్రీధర్ రెడ్డి, ఆత్మకూరు అమరేందర్ రెడ్డి, మండల అధ్యక్షులు పెద్దగొల్ల ఆంజనేయులు మరియు మండల బిఆర్ఎస్ నాయకులు పెద్ద సంఖ్యలో పాల్గొన్నారు.
Tags : newspage news, Sadasivapet Dump Yard Issue, MLA Chinta Prabhakar Inspection, MKpally Village Sangareddy
మమ్మల్ని ఫాలో అవ్వండి