- శిఖర కుంభాభిషేకంలో పాల్గొన్న నిర్మల జగ్గారెడ్డి!
- ఆలయ స్థాపన జరిగి 25 వసంతాలు పూర్తయిన సందర్భంగా
- మూడు రోజుల పాటు ఘనంగా యజ్ఞయాగాదులు..
- వేద పండితుల మంత్రోచ్ఛారణలతో ఆధ్యాత్మిక శోభ.
సంగారెడ్డి, అక్టోబర్ 24, న్యూస్ పేజ్ :
సంగారెడ్డి పట్టణంలోని బైపాస్ రోడ్డులో ప్రసిద్ధి చెందిన శ్రీ షిరిడీ సాయిబాబా ఆలయ ప్రతిష్ఠాపన జరిగి 25 సంవత్సరాలు పూర్తయిన సందర్భంగా నిర్వహించిన రజతోత్సవ వేడుకలు అత్యంత వైభవంగా జరిగాయి. ఆలయ కమిటీ పర్యవేక్షణలో, సీనియర్ నాయకులు జగ్గారెడ్డి, నిర్మల జగ్గారెడ్డి దంపతుల ప్రత్యేక సహకారంతో మూడు రోజుల పాటు వివిధ రకాల యజ్ఞయాగాదులు, కుంభ సంప్రోక్షణ కార్యక్రమాలను శాస్త్రోక్తంగా నిర్వహించారు. ఈ ఉత్సవాల ముగింపు రోజైన శనివారం ఆలయ శిఖరానికి నిర్వహించిన మహా శిఖర కుంభాభిషేక మహోత్సవంలో నిర్మల జగ్గారెడ్డి పాల్గొని సాయిబాబాకు ప్రత్యేక పూజలు సమర్పించారు.
ఈ రజతోత్సవ క్రతువులను కూకట్‌పల్లికి చెందిన ప్రముఖ ఆధ్యాత్మిక వేత్త నరేష్ పంతులు నేతృత్వంలో సుమారు 30 మంది వేద పండితులు అత్యంత నిష్ఠతో, శాస్త్రోక్తంగా జరిపించారు. ఉత్సవాల మొదటి రోజున లోకకల్యాణార్థం సుదర్శన యాగం, రెండవ రోజున దైవిక కాంతితో శత కలశాభిషేకం, మరియు మూడవ రోజున ఆలయ గోపుర శిఖర కుంభాభిషేకాన్ని వేద మంత్రోచ్ఛారణల నడుమ నేత్రపర్వంగా నిర్వహించారు. భక్తుల సాయి నామస్మరణలు, వేద పండితుల మంత్ర ఘోషతో ఆలయ ప్రాంగణమంతా షిరిడీ క్షేత్రాన్ని తలపిస్తూ ఆధ్యాత్మిక వాతావరణం నెలకొంది. ఈ పవిత్ర వేడుకలను తిలకించేందుకు వందలాది మంది భక్తులు ఆలయానికి పోటెత్తారు.
మూడవ రోజు జరిగిన విశేష పూజల్లో పాల్గొన్న నిర్మల జగ్గారెడ్డికి ఆలయ అర్చకులు పూర్ణకుంభంతో స్వాగతం పలికి, తీర్థప్రసాదాలు అందజేసి ఆశీర్వచనం చేశారు. ఈ మహత్తర ఆధ్యాత్మిక కార్యక్రమంలో ఆలయ కమిటీ ముఖ్య ప్రతినిధులు టీ. కాశప్ప, కేవీ నర్సయ్య, ఎస్. వీరేందర్, ప్రభాకర్ రెడ్డి తదితరులతో పాటు పెద్ద సంఖ్యలో భక్తులు, సాయి సేవకులు పాల్గొని ఉత్సవాలను విజయవంతం చేశారు. ఆలయానికి విచ్చేసిన భక్తులందరికీ నిర్వాహకులు ఎలాంటి ఇబ్బందులు కలగకుండా భారీ అన్నప్రసాద వితరణ కార్యక్రమాన్ని చేపట్టారు.
Tags : newspage news, Sangareddy Saibaba Temple, Silver Jubilee Celebrations, Nirmala Jagga Reddy
మమ్మల్ని ఫాలో అవ్వండి