- ఎండిన పంటల పరిశీలన.. అధికారులకు కీలక ఆదేశాలు!
- కాంగ్రెస్ ప్రభుత్వ నిర్లక్ష్యంతోనే రైతులకు తీవ్ర కష్టాలంటూ
- సంగారెడ్డి ఎమ్మెల్యే ఆగ్రహం.. పంటలను కాపాడేందుకు నిరంతర విద్యుత్ అందించాలని డిమాండ్.
కొండాపూర్, అక్టోబర్ 28, న్యూస్ పేజ్ :
కాంగ్రెస్ ప్రభుత్వ పాలనలో ముందస్తు ప్రణాళిక కొరవడటంతోనే రాష్ట్రంలో అన్నదాతలు తీవ్ర ఇబ్బందులు పడుతున్నారని సంగారెడ్డి శాసనసభ్యులు చింతా ప్రభాకర్ మండిపడ్డారు. కొండాపూర్ మండలంలో బుధవారం విస్తృతంగా పర్యటించిన ఆయన, సాగునీరు మరియు విద్యుత్ సరఫరా లేక నిలువునా ఎండిపోతున్న వరి పంటలను క్షేత్రస్థాయిలో స్వయంగా పరిశీలించారు. ఈ సందర్భంగా వివిధ గ్రామాల నుండి తరలివచ్చిన రైతులు సాగునీరు అందక, విద్యుత్ కోతలతో తాము పడుతున్న గోడును ఎమ్మెల్యే ఎదుట వెళ్లబోసుకున్నారు. చేతికందే దశలో ఉన్న వరి పంటలు ఎండిపోతున్నాయని మొరపెట్టుకున్నా విద్యుత్ అధికారులు నిర్లక్ష్యంగా సమాధానాలు ఇస్తున్నారని రైతులు వాపోవడంతో ఎమ్మెల్యే తీవ్ర అసహనం వ్యక్తం చేశారు.
అధికారుల తీరుపై ఆగ్రహం వ్యక్తం చేసిన ఎమ్మెల్యే చింతా ప్రభాకర్ వెంటనే అక్కడికక్కడే జిల్లా విద్యుత్ ఉన్నతాధికారికి (ఎస్ఈ) ఫోన్ చేసి మాట్లాడారు. క్షేత్రస్థాయిలో సబ్‌స్టేషన్ల సమస్యలను తక్షణమే పరిష్కరించి, పంటలను కాపాడేందుకు నిరంతరాయంగా నాణ్యమైన విద్యుత్ సరఫరా అందించేలా చర్యలు తీసుకోవాలని గట్టిగా ఆదేశించారు. ఈ సందర్భంగా ఎమ్మెల్యే మాట్లాడుతూ.. పదేళ్ల బీఆర్‌ఎస్ పాలనలో ఒక్క గంట కూడా కరెంట్ కోత లేకుండా చూశామని, ఏనాడూ పంటలు ఎండిపోయే పరిస్థితి రాలేదని రైతులు స్వయంగా గుర్తుచేసుకుంటున్నారని తెలిపారు. కాంగ్రెస్ పాలనలో మంత్రులు సమస్యలపై దృష్టి సారించి పరిష్కరించాల్సింది పోయి, ప్రగల్భాలు పలుకుతూ కాలయాపన చేయడం సరికాదని దుయ్యబట్టారు.
పంట నష్టపోతున్న రైతులెవరూ అధైర్యపడాల్సిన పనిలేదని, తాము ఎల్లవేళలా అన్నదాతలకు అండగా నిలబడి వారి సమస్యల పరిష్కారం కోసం అసెంబ్లీ లోపల, బయట పోరాటం చేస్తామని ఎమ్మెల్యే చింతా ప్రభాకర్ భరోసా ఇచ్చారు. పంట చేతికొచ్చే కీలక సమయంలో అన్నదాతలకు ఎలాంటి నష్టం కలగకుండా విద్యుత్, వ్యవసాయ శాఖ అధికారులు బాధ్యతగా మెలగాలని, లేనిపక్షంలో రైతుల పక్షాన పెద్ద ఎత్తున సబ్‌స్టేషన్ల ముట్టడి కార్యక్రమాలు చేపడతామని హెచ్చరించారు. ఈ పర్యటనలో స్థానిక బీఆర్‌ఎస్ నాయకులు, ఉమ్మడి జిల్లా ప్రజాప్రతినిధులు మరియు బాధిత రైతులు పెద్ద సంఖ్యలో పాల్గొన్నారు.
Tags : newspage news, MLA Chinta Prabhakar Kondapur, Dried Crops Inspection, Sangareddy Electricity Issues
మమ్మల్ని ఫాలో అవ్వండి