వరంగల్‌లో ట్రాఫిక్ పోలీసుల యాక్షన్.. వాహనదారులకు తీవ్ర హెచ్చరిక!

• శబ్ద కాలుష్య సైలెన్సర్లపై రోడ్డు రోలర్.. 350 సైలెన్సర్లు ధ్వంసం! 
• పోచమ్మ మైదాన్ నడిరోడ్డుపై సైలెన్సర్ల రూపురేఖలు మార్చిన పోలీసులు.. 

వరంగల్ క్రైమ్ బ్యూరో, న్యూస్ పేజ్ :

బైక్‌లకు కంపెనీ సైలెన్సర్లు తొలగించి, విపరీతమైన సౌండ్ చేస్తూ రోడ్లపై తిరిగే ఆకతాయి వాహనదారులకు వరంగల్ ట్రాఫిక్ పోలీసులు గట్టి షాక్ ఇచ్చారు. వరంగల్ పోలీస్ కమిషనర్ ఎన్.శ్వేత, ఐపీఎస్ ప్రత్యేక ఆదేశాల మేరకు, ట్రాఫిక్ అడిషనల్ డీసీపీ రాయల ప్రభాకరు రావు  ఆధ్వర్యంలో గురువారం వరంగల్ నగరంలోని పోచమ్మ మైదాన్ సర్కిల్ వద్ద ఒక వినూత్న కార్యక్రమం నిర్వహించారు. నిబంధనలకు విరుద్ధంగా వాహనాలకు అమర్చి, విపరీతమైన శబ్ద కాలుష్యానికి కారణమవుతున్న సుమారు 350 మార్పు చేసిన సైలెన్సర్లను (Modified Silencers) రోడ్డు రోలర్‌తో నడిరోడ్డుపై తొక్కిస్తూ పూర్తిగా ధ్వంసం చేశారు. ట్రాఫిక్ పోలీసుల ఈ ఆకస్మిక యాక్షన్ నగరంలో తీవ్ర సంచలనంగా మారింది.

స్పెషల్ డ్రైవ్‌లలో దొరికిన మోడిఫైడ్ సైలెన్సర్లు

నగరంలోని పలు ప్రధాన చౌరస్తాల వద్ద గత కొన్ని రోజులుగా ట్రాఫిక్ ఏసీపీ టి. సత్యనారాయణ మరియు ట్రాఫిక్ ఇన్‌స్పెక్టర్ల బృందం ప్రత్యేక తనిఖీలు (Special Drive) నిర్వహించింది. ఈ తనిఖీల సమయంలో ద్విచక్ర వాహనాలకు, ముఖ్యంగా బుల్లెట్ బైక్‌లకు కంపెనీ నిబంధనలకు విరుద్ధంగా మార్పులు చేసి అమర్చిన సైలెన్సర్లను పోలీసులు గుర్తించి, వాటిని అక్కడికక్కడే తొలగించి స్వాధీనం చేసుకున్నారు. ఆ విధంగా సేకరించిన 350 సైలెన్సర్లను పోచమ్మ మైదాన్ వద్ద రోడ్డుపై వరుసగా పరిచి, వాటిపై నుండి భారీ రోడ్డు రోలర్‌ను పోనిచ్చి ముక్కలు ముక్కలుగా తొక్కించేశారు.

• రూల్స్ బ్రేక్ చేస్తే చట్టపరమైన చర్యలు తప్పవు: అడిషనల్ డీసీపీ హెచ్చరిక

ప్రజలకు తీవ్ర అసౌకర్యం: ఈ సందర్భంగా ట్రాఫిక్ అడిషనల్ డీసీపీ రాయల ప్రభాకర్ రావు మాట్లాడుతూ.. బైక్ సైలెన్సర్లను మార్చి రోడ్లపై విపరీతమైన శబ్దాలు చేయడం వల్ల ధ్వని కాలుష్యం పెరగడమే కాకుండా సాధారణ ప్రజలకు తీవ్ర అసౌకర్యం కలుగుతోందని మండిపడ్డారు. ముఖ్యంగా పరీక్షలకు సిద్ధమయ్యే విద్యార్థులు, చిన్న పిల్లలు, వృద్ధులు మరియు ఆసుపత్రులలో ఉన్న అనారోగ్య బాధితులు ఈ శబ్దాల వల్ల తీవ్ర ఇబ్బందులు పడుతున్నారని ఆవేదన వ్యక్తం చేశారు.

మెకానిక్‌లపైనా కఠిన నిఘా: వాహనదారులు తమ వాహనాలలో కంపెనీ అమర్చిన ఒరిజినల్ సైలెన్సర్లను మాత్రమే వాడాలని స్పష్టం చేశారు. నిబంధనలు ఉల్లంఘిస్తే భారీ జరిమానాలతో పాటు చట్టపరమైన కేసులు నమోదు చేస్తామని హెచ్చరించారు. అంతేకాకుండా బైక్‌లకు ఇలాంటి సైలెన్సర్లు అమర్చే లోకల్ మెకానిక్ షాపులపై కూడా నిఘా పెడుతున్నట్లు తెలిపారు.

ఈ వినూత్న నిరసన మరియు ధ్వంసపూరిత కార్యక్రమంలో ట్రాఫిక్ ఏసిపి టి. సత్యనారాయణ, ట్రాఫిక్ ఇన్‌స్పెక్టర్ సుజాత, మరియు ఇతర ట్రాఫిక్ సిబ్బంది పెద్ద సంఖ్యలో పాల్గొన్నారు.

చివరగా నా మాట..

రోడ్లపై వెళ్లేటప్పుడు స్టైల్ పేరుతో ఇతరుల ప్రశాంతతను పాడుచేసే హక్కు ఎవరికీ లేదు. వరంగల్ ట్రాఫిక్ పోలీసులు తీసుకున్న ఈ నిర్ణయం శబ్ద కాలుష్యానికి పాల్పడే ఆకతాయిల గుండెల్లో రైళ్లు పరిగెత్తించడం ఖాయం. బైక్ సైలెన్సర్లు మార్చే ముందు వాహనదారులు పోలీసులు నడిపిన 'రోడ్డు రోలర్' విజువల్స్ గుర్తుతెచ్చుకుంటే మంచిది!