రేవంత్ రెడ్డి గారూ.. మా మొర ఆలకించండి! : పండుటాకుల అరణ్య రోదన!

రోగాలతో మరణిస్తున్న పెన్షనర్లు.. పెళ్లిళ్లకు నోచని పిల్లలు!
ఆశల కాగితాలపైనే తెలంగాణ ఉద్యోగుల బతుకులు!
గత 30 నెలలుగా నిరాశ నిస్పృహల నడుమ కాలం వెళ్లదీస్తున్న వృద్ధులు..
బాకీలు, పీఆర్సీపై కాంగ్రెస్ ప్రభుత్వానికి విశ్రాంత ఉద్యోగుల కన్నీటి విన్నపం!

Telangana State Pensioners and Retired Teachers Appealing For Pending DA and PRC Implementation

హైదరాబాద్ బ్యూరో, న్యూస్ పేజ్ :

జీవితాంతం ప్రభుత్వ సేవలోనే అరిగిపోయి, వృద్ధాప్యంలో ప్రశాంతంగా విశ్రాంతి తీసుకోవాల్సిన తెలంగాణ రాష్ట్ర విశ్రాంత ఉద్యోగుల (State Pensioners) జీవితాలు నేడు అత్యంత దయనీయంగా, హృదయవిదారకంగా మారాయి. ఒకప్పుడు సమాజంలో సగర్వంగా బ్రతికిన వృద్ధులు.. నేడు తమకు రావాల్సిన చట్టబద్ధమైన హక్కుల కోసం, పెండింగ్ నిధుల కోసం ప్రభుత్వ కార్యాలయాల చుట్టూ కాళ్లు అరిగేలా తిరుగుతున్నారు. "మా మోర ఆలకించండి.. దయచేసి మమ్మల్ని ఆదుకోండి" అంటూ వృద్ధ పెన్షనర్లు, ఉపాధ్యాయులు, మరియు ఉద్యోగ శ్రేణులు కన్నీటి పర్యంతమవుతున్నారు. సరైన సమయానికి వైద్య ఖర్చులకు డబ్బులు అందక, చేతిలో చిల్లిగవ్వ లేక అనేకమంది వృద్ధులు రోగాల బారిన పడి అనాథలుగా మరణిస్తున్న దృశ్యాలు తెలంగాణ సమాజంలో గుండెలను పిండేస్తున్నాయి. పెన్షనర్లు పడుతున్న వేదనపై న్యూస్ పేజ్ ప్రత్యేక కథనం..

రిటైర్ అయినా తీరని అప్పులు.. పెళ్లిళ్లకు నోచని పిల్లలు!

ఈ వృద్ధాప్యంలో పెన్షనర్లను వేధిస్తున్న అతిపెద్ద బాధ.. తమకు రావలసిన రిటైర్మెంట్ బెనిఫిట్స్ (గ్రాట్యుటీ, కమ్యుటేషన్, జీపీఎఫ్) సకాలంలో విడుదల కాకపోవడమే. జీవితాంతం కష్టపడి సంపాదించిన సొమ్ము చేతికి వస్తే, వృద్ధాప్యంలో పిల్లల పెళ్లిళ్లు చేయవచ్చని, అప్పులు తీర్చవచ్చని ఎన్నో ఆశలు పెట్టుకున్నారు. కానీ, రిటైర్ అయ్యి ఏళ్లు గడుస్తున్నా సకాలంలో రావలసిన బాకీలు రాకపోవడంతో.. ఇప్పటికీ పెళ్లిళ్లు కాకుండా ఇంట్లోనే ఉండిపోయిన యువతీ యువకులు ఎందరో ఉన్నారు. వయసు పైబడుతున్నా పిల్లల భవిష్యత్తును ఒక కొలిక్కి తీసుకురాలేకపోయామనే ఆవేదన, మానసిక క్షోభ వృద్ధ తల్లిదండ్రులను లోలోపల నశింపజేస్తోంది.

30 నెలల నిరీక్షణ.. ‘ఆశ’ మాత్రమే బతికిస్తోంది!

ఒకేసారి డీఏలు విడుదల చేయాలి: ఉద్యోగులు, ఉపాధ్యాయులు, మరియు పెన్షనర్లు తమకు రావలసిన కరువు భత్యం (DA) కోసం గత 30 నెలలుగా ఎడతెరిపి లేకుండా ఎదురుచూస్తున్నారు. పెరిగిన నిత్యావసరాల ధరల నడుమ, వృద్ధాప్య మందుల ఖర్చుల భారం మోయలేక సతమతమవుతున్నారు. పెండింగ్‌లో ఉన్న అన్ని డీఏలను (DA Arrears) ఒకేసారి విడుదల చేసి తమను ఆదుకోవాలని వారు ప్రభుత్వాన్ని వేడుకుంటున్నారు.

పీఆర్సీ సిఫార్సులను అమలు చేయండి: నూతన పే రివిజన్ కమిషన్ (PRC) యొక్క సిఫార్సులను వెంటనే ఆమోదించి, నూతన వేతన సవరణను అమలు పరచాలని డిమాండ్ చేస్తున్నారు. ఎన్నికల ముందు కాంగ్రెస్ పార్టీ ఇచ్చిన ప్రతి ఒక్క వాగ్దానాన్ని నిలబెట్టుకోవాలని, ముఖ్యమంత్రి రేవంత్ రెడ్డి మానవత్వంతో ఆలోచించాలని కోరుతున్నారు.

నిరాశల నడుమ కాలం వెళ్లదీస్తున్న వృద్ధులు: "గత పాలకుల నిర్లక్ష్యం చూసి విసిగిపోయాం.. కాంగ్రెస్ ప్రభుత్వం వస్తే మా జీవితాల్లో మంచి జరుగుతుందని ఎంతో ఆశపడ్డాం. కానీ ఇప్పుడు ఆ ఆశ మాత్రమే మమ్మల్ని బతికిస్తోంది. నిరాశ నిస్పృహల నడుమ కాలాన్ని వెళ్లదీస్తున్నాము" అని పెన్షనర్ల సంఘాల నేతలు కన్నీరు మున్నీరవుతున్నారు. దయచేసి గమనించండి, "మనసుంటే మార్గం ఉంటుంది".. ప్రజా పాలన అందిస్తున్న కాంగ్రెస్ ప్రభుత్వం తలచుకుంటే తమ సమస్యలను తప్పకుండా పరిష్కరించగలదనే అచంచలమైన నమ్మకం, విశ్వాసం ఇప్పటికీ తమకు ఉందని వృద్ధులు నమ్ముతున్నారు.

ఓ వృద్ధ పెన్షనర్ ఆవేదన..
"35 ఏళ్లు నిబద్ధతతో ప్రభుత్వ సేవ చేశాను. కానీ నేడు నా సొంత వైద్య ఖర్చులకు, అంగ వైకల్యంతో బాధ పడుతూ, సరైన వైద్యం అందక బాధపడుచున్నాను. గత 30 నెలలుగా మాకు రావలసిన డీఏ బాకీలను నిలిపివేయడం అత్యంత అన్యాయం. నిత్యావసర వస్తువులకు, మందులు కొనడానికే అప్పులు చేయాల్సి వస్తోంది. ముఖ్యమంత్రి రేవంత్ రెడ్డి గారు దయచేసి మానవత్వంతో ఆలోచించి మా బకాయిలను వెంటనే విడుదల చేయాలి."
డాక్టర్ అడ్లూరు నరసింహమూర్తి, రిటైర్డ్ మ్యాథ్స్ లెక్చరర్, హనుమకొండ.

విశ్రాంత ఉద్యోగుల కుటుంబాలలో కొంతవరకు ఆర్థిక ఉపశమనం..

తెలంగాణ రాష్ట్ర ప్రభుత్వ పెన్షనర్లు మరియు విశ్రాంత ఉద్యోగులకు రేవంత్ రెడ్డి ప్రభుత్వం దసరా పండుగ కానుకగా తీపి కబురు అందించింది. గత కొంతకాలంగా పెండింగ్‌లో ఉన్న బకాయిలపై అక్టోబర్ 1, 2026న జరిగిన ప్రత్యేక రాష్ట్ర క్యాబినెట్ సమావేశంలో ప్రభుత్వం కీలక నిర్ణయం తీసుకుంది. దీర్ఘకాలంగా నిలిచిపోయిన రెండు పెండింగ్ డియర్నెస్ రిలీఫ్ (DR / DA) ఇన్‌స్టాల్‌మెంట్‌లను మంజూరు చేస్తూ క్యాబినెట్ అధికారికంగా ఆమోదం తెలిపింది. గత 30 నెలలుగా ఆర్థిక ఇబ్బందులు మరియు నిరాశ నిస్పృహల నడుమ కాలం వెళ్లదీస్తున్న లక్షలాది మంది వృద్ధ పెన్షనర్లకు ప్రభుత్వ తాజా నిర్ణయం ఎంతో ఊరటనివ్వనుంది. దసరా పండుగ ముందే ఈ నిధులు విడుదల కానుండటంతో, వైద్య ఖర్చులు మరియు పండుగ అవసరాల నిమిత్తం విశ్రాంత ఉద్యోగుల కుటుంబాలలో కొంతవరకు ఆర్థిక ఉపశమనం లభించనుంది. ముఖ్యమంత్రి రేవంత్ రెడ్డి గారు మానవత్వంతో స్పందించి ఈ బకాయిలను ఆమోదించడం పట్ల పెన్షనర్ల సంఘాల నేతలు హర్షం వ్యక్తం చేస్తున్నారు.

చివరగా..

ఒక దేశం లేదా రాష్ట్రం ఎంతవరకు అభివృద్ధి చెందిందనేది.. ఆ సమాజంలో ఉన్న వృద్ధులను, విశ్రాంత ఉద్యోగులను ప్రభుత్వం ఎంత గౌరవంగా చూసుకుంటుందనే దానిపైనే ఆధారపడి ఉంటుంది. తమ యవ్వనాన్ని, శ్రమను మొత్తం తెలంగాణ సమాజ నిర్మాణానికి ధారపోసిన ఈ వృద్ధ పెన్షనర్లను రోగాల పాలై అనాథలుగా మరణించేలా వదిలేయడం అత్యంత అమానుషం. ఆర్థిక ఇబ్బందులు ఎన్ని ఉన్నప్పటికీ.. ముఖ్యమంత్రి రేవంత్ రెడ్డి గారు ప్రత్యేక చొరవ తీసుకుని, వృద్ధుల కన్నీళ్లు తుడిచేలా పెండింగ్ నిధులు, డీఏలను తక్షణమే విడుదల చేయాలి. మనసున్న ప్రభుత్వంగా నిరూపించుకోవాల్సిన సమయం ఆసన్నమైంది!

Tags : Telangana Pensioners Issues 2026, Pending DA Release Demand, PRC Commission Updates Telangana, Newspage Regional News