- భక్తి పారవశ్యంలో సదాశివపేట..
- అమ్మవారి నామస్మరణతో మార్మోగిన పురవీధులు..
- రజక సంఘం ఆధ్వర్యంలో కోలాటాలు, భక్తి గీతాలతో భక్తుల కోలాహలం.
సదాశివపేట, అక్టోబర్ 27, న్యూస్ పేజ్ :
సదాశివపేట పట్టణంలో దేవీ శరన్నవరాత్రుల ముగింపు ఉత్సవాలను పురస్కరించుకుని శ్రీ పెద్దమ్మ భవాని అమ్మవారి భవ్య ఊరేగింపు మహోత్సవం భక్తిశ్రద్ధల మధ్య అత్యంత కన్నులపండువగా జరిగింది. ఉత్సవాల్లో భాగంగా ఆలయంలో అమ్మవారి ఉత్సవ విగ్రహానికి అర్చకుల ఆధ్వర్యంలో విశేష అభిషేకాలు, అలంకరణ పూజలు నిర్వహించారు. అనంతరం వేదమంత్రోచ్ఛారణలు, భక్తుల జయజయధ్వానాల నడుమ అమ్మవారి శోభాయాత్రను అధికారికంగా ప్రారంభించారు. స్థానిక రజక సంఘం మరియు ఆలయ కమిటీ సభ్యుల సంయుక్త ఆధ్వర్యంలో నిర్వహించిన ఈ ఊరేగింపు పట్టణంలోని ప్రముఖ కూడళ్లయిన గాంధీ చౌక్, తిలక్ రోడ్డు, ప్రధాన బస్టాండ్ మీదుగా శ్రీ పెద్దమ్మ భవాని అమ్మవారి మందిరం వరకు అత్యంత వైభవంగా సాగింది.
ఊరేగింపు సాగిన మార్గమంతా స్థానిక మహిళలు, భక్తులు రోడ్లపైకి వచ్చి కదిలివచ్చిన జగన్మాతకు మంగళహారతులు పడుతూ, కర్పూరం వెలిగించి మొక్కులు చెల్లించుకున్నారు. ఈ శోభాయాత్రలో మహిళలు సాంప్రదాయ దుస్తులు ధరించి లయబద్ధంగా కోలాటాలు ఆడుతూ, భక్తి గీతాలు ఆలపిస్తూ ఉత్సవానికి ప్రత్యేక ఆధ్యాత్మిక ఆకర్షణగా నిలిచారు. అటు యువకులు భక్తి పాటల హోరు, డీజే సంగీతానికి అనుగుణంగా ఉత్సాహంగా నృత్యాలు చేస్తూ వేడుకల్లో ఉత్సాహం నింపారు. ‘జై భవాని.. జై జై భవాని’ నామస్మరణతో సదాశివపేట పురవీధులన్నీ ఆధ్యాత్మిక వాతావరణంతో మార్మోగిపోయాయి. ఈ మహత్తర కార్యక్రమంలో వివిధ రాజకీయ పార్టీల ప్రముఖులు, రజక సంఘం ప్రతినిధులు, ఆలయ కమిటీ సభ్యులు మరియు వందలాది మంది భక్తులు పాల్గొన్నారు.
ఉత్సవం విజయవంతంగా ముగిసిన అనంతరం ఆలయ ప్రాంగణంలో భక్తులందరికీ కమిటీ తరఫున తీర్థప్రసాదాల వితరణ మరియు మహా అన్నదాన కార్యక్రమాన్ని నిర్వహించారు. పట్టణంలో శాంతిసౌభాక్యాలు వెల్లివిరియాలని, ప్రజలంతా సుఖసంతోషాలతో ఉండాలని ఈ సందర్భంగా పెద్దలు అమ్మవారిని వేడుకున్నారు.
Tags : newspage news, Sadasivapet Peddamma Bhavani, Rajaka Sangham Festival, Ammavari Shobhayatra 2026
మమ్మల్ని ఫాలో అవ్వండి