రేవంత్ రెడ్డి.. నీకు ఇచ్చే టైం కేవలం 60 రోజులే!

లక్డీకాపూల్‌లో హై టెన్షన్
సింగరేణి భవన్‌ను ముట్టడించిన కల్వకుంట్ల కవిత..
నడిరోడ్డుపై బైఠాయించి 60 రోజుల అల్టిమేటం!
11 ప్రధాన డిమాండ్లతో రేవంత్ రెడ్డి ప్రభుత్వంపై కవిత విరుచుకుపాటు..
లక్డీకాపూల్‌లో భారీగా మోహరించిన పోలీస్ బలగాలు!

TRS President Kalvakuntla Kavitha Leading Singareni Bhavan Siege Protest In Hyderabad

హైదరాబాద్ బ్యూరో, న్యూస్ పేజ్:

రేవంత్ రెడ్డి.. నీకు ఇచ్చే టైం కేవలం 60 రోజులే.. సింగరేణి కార్మికుల జోలికొస్తే చరిత్ర తిరగరాయడం ఖాయం! డిపెండెంట్ ఉద్యోగాలు అనేవి ఆ కార్మిక కుటుంబాల హక్కు... నీ ప్రభుత్వం వేసే భిక్ష కాదు! ఒక్కటి గుర్తుపెట్టుకో... బొగ్గు గనిలో చెమటోడ్చే కార్మికుడికి హక్కులు కాలరాయడం అలవాటైతే, ఆ గని తిరగబడితే ఎలా ఉంటుందో చూపిస్తాం. మేం ఇచ్చిన 11 అంశాల డిమాండ్ల చార్టర్‌పై ఈ 60 రోజుల్లోగా సానుకూల నిర్ణయం రాకపోతే... సింగరేణి నలుమూలలా సమ్మె సైరన్ మోగుతుంది! ఆ పారిశ్రామిక ప్రాంతం ఆందోళనల అగ్నిగుండం అవుతుంది. ఇది కేవలం వినతిపత్రం కాదు... తెలంగాణ బొగ్గు గని కార్మికుల తరపున కల్వకుంట్ల కవిత ఇస్తున్న అల్టిమేటం! ఇక ఆటలు సాగవు... తేల్చుకుంటాం!" అంటూ కల్వకుంట్ల కవిత సీఎం రేవంత్ రెడ్డి కి మాస్ వర్కింగ్ ఇచ్చారు.

రాజధాని హైదరాబాద్ నడిబొడ్డున రాజకీయ సంచలనం చోటుచేసుకుంది. సింగరేణి బొగ్గు గని కార్మికుల దీర్ఘకాలిక సమస్యలను తక్షణమే పరిష్కరించాలని డిమాండ్ చేస్తూ తెలంగాణ రక్షణ సేన (TRS) అధ్యక్షురాలు, హింద్ మజ్దూర్ సభ (HMS) గౌరవాధ్యక్షురాలు కల్వకుంట్ల కవిత ఆధ్వర్యంలో సోమవారం హైదరాబాద్‌లోని లక్డీకాపూల్ వద్ద ఉన్న సింగరేణి భవన్ ముట్టడి కార్యక్రమం జరిగింది. వేలాది మంది కార్మికులు, పార్టీ శ్రేణులు, మరియు హెచ్.ఎమ్.ఎస్ (HMS) ప్రతినిధులతో కలిసి కవిత సింగరేణి భవన్ వెలుపల ప్రధాన రహదారిపైనే బైఠాయించి భారీ ఎత్తున ధర్నా నిర్వహించారు. ఈ ఊహించని ఆందోళన కారణంగా లక్డీకాపూల్ పరిసర ప్రాంతాల్లో తీవ్ర ఉద్రిక్త వాతావరణం నెలకొనగా, పోలీసులు భారీగా మోహరించారు.

రేవంత్ రెడ్డి సర్కార్‌పై కవితమ్మ నిప్పులు.. 60 రోజుల గడువు!

ధర్నా వేదికపై కల్వకుంట్ల కవిత మాట్లాడుతూ కాంగ్రెస్ ప్రభుత్వం మరియు ముఖ్యమంత్రి రేవంత్ రెడ్డి తీరుపై తీవ్రస్థాయిలో విరుచుకుపడ్డారు. సింగరేణి కార్మికుల హక్కులను కాలరాస్తే ఊరుకునేది లేదని హెచ్చరించారు. కార్మికుల కుటుంబాలకు డిపెండెంట్ ఉద్యోగాలు పొందడం అనేది వారి ప్రాథమిక హక్కే కానీ, ప్రభుత్వ భిక్ష కాదని స్పష్టం చేశారు. ఈ సందర్భంగా సింగరేణి యాజమాన్యానికి, రాష్ట్ర ప్రభుత్వానికి కవిత 60 రోజుల గడువు (అల్టిమేటం) జారీ చేశారు. ఈ లోగా 11 అంశాల చార్టర్‌పై ప్రభుత్వం సానుకూల నిర్ణయం తీసుకోకపోతే, సింగరేణి వ్యాప్తంగా సమ్మె సైరన్ మోగిస్తామని, ఆందోళనలను మరింత తీవ్రతరం చేస్తామని అల్టిమేటం ఇచ్చారు.

కార్మికుల గళం : సింగరేణి యాజమాన్యం ముందు ఉంచిన 11 ప్రధాన డిమాండ్లు ఇవే!

ఆర్థిక మరియు ఉద్యోగ భద్రత:

35% లాభాల వాటా: సింగరేణి సంస్థ ఆర్జించిన వాస్తవ లాభాల్లో కార్మికులకు తక్షణమే 35 శాతం బోనస్ (లాభాల వాటా) ప్రకటించి చెల్లించాలి.
రూ. 62,000 కోట్ల బకాయిలు: ప్రభుత్వం సింగరేణి సంస్థకు చెల్లించాల్సిన రూ. 62,000 కోట్ల బకాయిలను వెంటనే విడుదల చేసి సంస్థను ఆర్థికంగా బలోపేతం చేయాలి.
మెడికల్ బోర్డు & డిపెండెంట్ ఉద్యోగాలు: నెలకు రెండు సార్లు మెడికల్ బోర్డు నిర్వహించాలి. మెడికల్ అన్‌ఫిట్ అయిన కార్మికుల వారసులకు ఎలాంటి జాప్యం లేకుండా తక్షణమే డిపెండెంట్ ఉద్యోగాలు కల్పించాలి. విజిలెన్స్ పేరుతో నిలిపివేసిన నియామకాలను వెంటనే ఖరారు చేయాలి.

కార్మికుల సంక్షేమ హక్కులు:

సొంత ఇల్లు - భూమి కేటాయింపు: హోమ్-ఓనర్ స్కేమ్ కింద ప్రతి సింగరేణి కార్మికుడికి ఇల్లు నిర్మించుకోవడానికి రెండు గుంటల భూమిని కేటాయించాలి.
ఆదాయపు పన్ను మినహాయింపు: భూగర్భ గనుల్లో ప్రాణాలకు తెగించి పనిచేసే సింగరేణి ఉద్యోగుల వేతనాలపై ఇన్‌కమ్ టాక్స్ (ఆదాయపు పన్ను) పూర్తిగా రద్దు చేయాలి.
కొత్త బొగ్గు గనుల కేటాయింపు: సింగరేణి మనుగడను కాపాడటానికి సంస్థకే కొత్త బొగ్గు గనులను (Coal Blocks) కేటాయించాలని, ప్రైవేటీకరణ చర్యలను ఆపాలని డిమాండ్ చేశారు.
అలియాస్ నేమ్స్ సమస్య పరిష్కారం: కార్మికులను వేధిస్తున్న మారుపేర్ల (Alias Names) సమస్యను వెంటనే పరిష్కరించి, జూనియర్ అసిస్టెంట్ ఖాళీలను భర్తీ చేయాలి.

ఈ భారీ ముట్టడి కార్యక్రమంలో సింగరేణి బొగ్గు గని పరివాహక ప్రాంతాలైన గోదావరిఖని, భూపాలపల్లి, కొత్తగూడెం, మరియు బెల్లంపల్లి నుండి కార్మికులు, అనుబంధ సంఘాల నేతలు, వివిధ జిల్లాల టిఆర్ఎస్ పార్టీ ప్రతినిధులు భారీ ఎత్తున తరలివచ్చి కవితమ్మకు మద్దతుగా నిలిచారు

చివరగా.. తెలంగాణ ఆర్థిక రంగానికి సింగరేణి సంస్థ ఒక వెన్నెముక లాంటిది. కార్మికులు ప్రాణాలకు తెగించి బొగ్గు తీస్తేనే రాష్ట్రం విద్యుత్ వెలుగులతో నిండుతోంది. అటువంటి కార్మికుల న్యాయమైన సమస్యలపై కల్వకుంట్ల కవిత లక్డీకాపూల్ నడిరోడ్డుపై బైఠాయించి చేసిన ఈ పోరాటం రేవంత్ రెడ్డి ప్రభుత్వంపై తీవ్ర ఒత్తిడిని తీసుకురావడం ఖాయం. ప్రభుత్వం ఇప్పటికైనా స్పందించి, సింగరేణికి రావాల్సిన రూ. 62,000 కోట్ల బకాయిలను విడుదల చేసి, కార్మికుల డిమాండ్లను పరిష్కరిస్తేనే సంస్థ మనుగడ సాధ్యమవుతుంది. 60 రోజుల డెడ్‌లైన్ లోపు ప్రభుత్వం ఎలాంటి నిర్ణయం తీసుకుంటుందో వేచి చూడాలి!

Tags : Kalvakuntla Kavitha Singareni Bhavan Protest, TRS Leader Kavitha Hyderabad Dharna, Singareni Workers 11 Demands List, Newspage Political News