- గత పాలకుల నిర్లక్ష్యపు చీకట్లకు చెక్..
- బైపాస్ దెబ్బతో కుదేలైన వ్యాపారానికి సరికొత్త సంజీవని!
- మంత్రి దామోదర రాజనర్సింహ దార్శనికతతో..
- జోగిపేటకు మళ్లీ పూర్వ వైభవం.. కళకళలాడనున్న వాణిజ్య సామ్రాజ్యం!
- ఆందోల్-జోగిపేట మున్సిపల్ వైస్ చైర్మన్ అకుల సత్యనారాయణ (చిట్టిబాబు)
జోగిపేట్, న్యూస్ పేజ్ :
గత పదేళ్ల బీఆర్‌ఎస్ పాలనలో తీసుకున్న అనాలోచిత నిర్ణయాల వల్ల చారిత్రక వాణిజ్య కేంద్రమైన జోగిపేట పట్టణం తన పాత వ్యాపార వైభవాన్ని కోల్పోయిందని ఆందోల్-జోగిపేట మున్సిపల్ వైస్ చైర్మన్ అకుల సత్యనారాయణ (చిట్టిబాబు) అన్నారు. ఎన్‌హెచ్-161 బైపాస్ రోడ్డు నిర్మాణం కారణంగా జోగిపేట పట్టణంలో రాకపోకలు, వ్యాపార కార్యకలాపాలు బాగా తగ్గిపోయాయని ఆయన పేర్కొన్నారు. అయితే ప్రస్తుతం ప్రజా ప్రభుత్వంలో పరిస్థితులు వేగంగా మారుతున్నాయని, మంత్రి దామోదర రాజనర్సింహ ఆలోచనలతో జోగిపేట పూర్వ వైభవాన్ని తిరిగి తీసుకురావడమే లక్ష్యంగా అభివృద్ధి పనులు శరవేగంగా సాగుతున్నాయని తెలిపారు.
మంజీరాపై రూ.80 కోట్ల వంతెన.. 20 గ్రామాల ప్రజలకు మహర్దశ!
సంగారెడ్డి, మెదక్ జిల్లాలను అనుసంధానిస్తూ మంజీరా నదిపై సుమారు రూ. 80 కోట్ల వ్యయంతో వంతెనతో కూడిన రహదారి నిర్మాణానికి ప్రభుత్వం చర్యలు తీసుకోవడం అభినందనీయమన్నారు. అల్మాపూర్ ఉన్నతస్థాయి వంతెన నిర్మాణం పూర్తయితే జోగిపేటతో పాటు మెదక్ జిల్లాలోని సుమారు 20 గ్రామాల ప్రజలకు నేరుగా జోగిపేటకు రాకపోకలు సాగించే వెసులుబాటు కలుగుతుందని వివరించారు.
తిరిగి కళకళలాడనున్న జోగిపేట వాణిజ్యం!
ఒకప్పుడు ఉమ్మడి మెదక్ జిల్లాలోనే ప్రధాన వాణిజ్య కేంద్రంగా జోగిపేట విలసిల్లిందని గుర్తుచేశారు. బైపాస్ రోడ్డు వల్ల పట్టణంలో జనం తగ్గిపోయి వ్యాపారాలు మందగించాయన్నారు. కానీ ఇప్పుడు మంజీరాపై వంతెన నిర్మాణం పూర్తయితే చుట్టుపక్కల గ్రామాల నుంచి ప్రజల రాకపోకలు మళ్లీ పెద్ద ఎత్తున పెరుగుతాయని, దీంతో పట్టణంలోని మార్కెట్లు, వర్తక, వాణిజ్య వ్యాపారాలు మునుపటిలా కళకళలాడుతాయని ఆశాభావం వ్యక్తం చేశారు.
ప్రజా సమస్యల పరిష్కారమే లక్ష్యం!
గత పాలకుల నిర్లక్ష్యానికి గురైన సమస్యలకు శాశ్వత పరిష్కారం చూపుతూ ప్రజల జీవన ప్రమాణాలు, రవాణా సౌకర్యాలను మెరుగుపరిచేందుకు ప్రభుత్వం చిత్తశుద్ధితో పనిచేస్తోందని చిట్టిబాబు తెలిపారు. మంజీరా నదిపై నిర్మించే ఈ వంతెన జోగిపేట అభివృద్ధికి కొంగొత్త ఊపిరి పోస్తుందని, వ్యాపార విస్తరణకు కీలక మైలురాయిగా నిలుస్తుందని స్పష్టం చేశారు.
Tags : Jogipet Manjeera Bridge, Minister Damodar Rajanarasimha, Sangareddy Medak Road Connectivity, Newspage Telangana Political News
మమ్మల్ని ఫాలో అవ్వండి