- 24 గంటల్లోగా నివేదిక సమర్పించాలి.. విచారణకు డెడ్లైన్!
న్యూఢిల్లీ బ్యూరో, న్యూస్ పేజ్ :
భారత ఎన్నికల ప్రక్రియలో నల్లధనం (Black Money) ప్రభావాన్ని అరికట్టేందుకు సుప్రీంకోర్టు ఒక చారిత్రాత్మక తీర్పునిస్తూ దేశవ్యాప్తంగా కఠినమైన మార్గదర్శకాలను జారీ చేసింది. జస్టిస్ సంజయ్ కరోల్ మరియు జస్టిస్ ఎన్.కె. సింగ్ లతో కూడిన ధర్మాసనం.. ఎన్నికల్లో అక్రమ డబ్బు చలామణీ కావడం వల్ల ఓటర్ల స్వేచ్ఛా హక్కు దెబ్బతింటుందని, ఇది ప్రజాస్వామ్య మూలాలకే ప్రమాదకరమని ఆందోళన వ్యక్తం చేసింది. ఈ నేపథ్యంలో దర్యాప్తు సంస్థలు, ఎన్నికల సంఘానికి అత్యంత కీలకమైన ఆదేశాలు జారీ చేసింది.
సుప్రీంకోర్టు జారీ చేసిన ప్రధాన మార్గదర్శకాలు:
- 24 గంటల డెడ్లైన్: ఎన్నికల సమయంలో ఎక్కడైనా నగదు లేదా ఇతర విలువైన ఆస్తులను స్వాధీనం చేసుకుంటే (Seizure), సదరు అధికారులు 24 గంటల లోపు ఆ వివరాలను స్థానిక జిల్లా మేజిస్ట్రేట్ (DM), అదనపు జిల్లా మేజిస్ట్రేట్ (ADM) లేదా సంబంధిత కోర్టుకు నివేదించాలి. అంతేకాకుండా, సదరు నగదుకు ఎన్నికల అక్రమాలతో ఉన్న సంబంధాన్ని (Prima facie nexus) లిఖితపూర్వకంగా వివరించాలి.
ఏడాదిలోనే దర్యాప్తు పూర్తి: ఎన్నికల నిబంధనల ఉల్లంఘనలపై నమోదయ్యే ఎఫ్ఐఆర్ (FIR) ల దర్యాప్తును దర్యాప్తు అధికారులు ఒక సంవత్సరం లోపు పూర్తి చేయాలి. ఒకవేళ కాలపరిమితి దాటితే, దానికి గల కారణాలను రికార్డు చేసి, భారత ఎన్నికల సంఘానికి (ECI) నివేదించాలి.
ఐటీ శాఖకు బదిలీ: స్టాటిక్ సర్వైలెన్స్ టీమ్స్ (SST) తనిఖీల్లో రూ. 10 లక్షల కంటే ఎక్కువ నగదు పట్టుబడితే, ఆ సమాచారాన్ని వెంటనే ఆదాయపు పన్ను (Income Tax) అధికారులకు బదిలీ చేయాలి.
కేసుల ఉపసంహరణపై నిషేధం: ప్రభుత్వం మారిన ప్రతిసారీ రాజకీయ నేతలపై ఉన్న ఎన్నికల అక్రమాల కేసులను ఏకపక్షంగా ఉపసంహరించుకోవడంపై కోర్టు బ్రేక్ వేసింది. హైకోర్టు ముందస్తు అనుమతి లేకుండా ఎలాంటి కేసులను ఉపసంహరించడానికి వీల్లేదని స్పష్టం చేసింది. హైకోర్టులు ఈ కేసుల కోసం ప్రత్యేక ఫాస్ట్ ట్రాక్ కోర్టులను ఏర్పాటు చేయాలని సూచించింది.
ఉచితాలు, లంచాలపై స్పష్టత
ఎన్నికల సమయంలో ఓటర్లను ప్రలోభపెట్టేందుకు ఇచ్చే ఉచితాలు, లంచాలు ప్రజాస్వామ్య సమానత్వాన్ని దెబ్బతీస్తాయని కోర్టు పేర్కొంది. ఈ మార్గదర్శకాల అమలుపై కేంద్ర ప్రభుత్వం, ఎన్నికల సంఘం వచ్చే నవంబర్ 18, 2026 లోపు పూర్తి నివేదికను (Compliance Report) సమర్పించాలని సుప్రీంకోర్టు ఆదేశించింది.
మమ్మల్ని ఫాలో అవ్వండి